Date: 12 Feb 2026
Yeh story meri life ki hai aur saath mein uss akeli cat ki. Jab bhi main use dekhti hoon, mujhe lagta hai hum dono ek hi qismat lekar paida hue hain, apna ka pyaar kho dene ki qismat.
Meri billi paida hui thi sadak ke ek kone mein jahaan shor zyada tha aur apnapan kam. Woh apni mom ki garmi aur hifazat mein rehti thi, par yeh khushi sirf kuch hi dino ki thi. Ek din uski mom chali gayi hamesha ke liye. Meri billi, jiski aankhein abhi poori tarah duniya ko pehchaan bhi nahi paayi thi, akeli rah gayi. Uss raat use bahut darr laga. Usey laga jaise uske andar ka chota sa diya kisi ne bujha diya ho.
Mujhe bhi yaad hai jab mere zindagi mein achanak se sab badal gaya. Jab mere saath khade rehne wale log mujhse door ho gaye. Mujhe laga jaise main ek bhanwar mein hoon aur koi sahara nahi hai. Meri billi aur main, hum dono ne bahut jaldi seekh liya ki ab humein apni bhookh aur apne darr se khud hi ladna hoga. Yeh sabse bada sach tha.
Jab bhookh lagti hai toh darr bhi thoda kamzor pad jaata hai. Billi ko insaanon ke paas jaana pada, par woh seedhe kisi par yakeen nahi kar sakti thi. Woh pehle door khadi hokar gaur karti thi, phir woh apni awaaz ko bahut halka aur dukhbhara banakar myaoon karti thi. Yeh awaaz itni soft hoti thi ki kisi ko bhi gussa na aaye, bas taras aa jaaye. Ab isse fake acting kaho ya bhook mitane ke liye ki gayi koshish, pet ke liye unhe ye karna padta hai.
Woh aaram se aage badhti thi jaise keh rahi ho, "Dekho main bahut choti hoon, mujhe takleef mat dena." Jab koi uski taraf pyaar se dekhta, toh woh apni palkein dheere se jhapkaati thi. Yeh uski zabaan thi yeh batane ki: main tum par bharosa karti hoon, kya tum mujhe chhod kar toh nahi jaoge?
Main bhi apni life mein dosti ya pyaar paane ke liye yahi tareeka apnaati hoon. Main bhi pehle sabko khush karti hoon, unka dil jeet-ti hoon aur phir umeed karti hoon ki woh mere saath rahenge. Aisa nahi hai ki mere paas friends nahi hain, bohot hain lekin wo sab ek time tak saath rahenge. Kuch matlabi hain toh kuch sirf apna hone ka natak karte hain. Jo friends mujhe bina dekhe, mujhse personally mile bina mujhpe trust karte hain, wahi mere asli friends hain. Pramod, Angel, Innocent (Talib), Jalpana aur Shubham... ye log mujhse bohot door hain par suhani didi naam se trust karte hain. Hamein PUBG game ne bahut kuch diya, friends aur ek achi editor jo meri saloni ki videos edit karti hai. Ye log marte dam tak yaad rahenge.
Uss billi aur main, har rishte mein ek chhupa hua darr lekar chalte hain ki kahin phir se akela na rehna pade. Phir bhi kabhi failure ka darr nahi rakhte, agar success mili toh achi baat hai warna fail hokar jo seekhne milta hai wo experience ban jata hai.
Par meri billi sirf masoomiyat nahi hai, uske andar ek chhota sa jwaalamukhi hai. Jab koi bada kutta uski taraf lapakta hai toh woh bhagti nahi hai. Uski chhoti si body ek pal mein sakht ho jaati hai, uske baal khade ho jaate hain aur uski gurrahat itni tez hoti hai ki kutta bhi ruk jaata hai. Uski palat-waar ki speed itni zyada hoti hai ki woh hawa se bhi tez bach nikalti hai. Uski spirit kabhi haar nahi maanti, woh gir kar bhi hamesha chaar pairon par khadi hoti hai. Billi ko kaise bhi hawa se chhodo, wo sidha apne pairon par hi girti hai.
Jab meri life mein mushkil din aaye toh maine bhi uss cat ki tarah apne aap ko taiyaar kiya. Main rona band kar deti hoon aur taakat ban jaati hoon. Mera dil andar se toot chuka hota hai par maine chehre par kabhi shikast nahi dikhai. Main bhi yahi sabit karti hoon ki main chott kha sakti hoon par toot nahi sakti. Ab aadat kaho ya duniyadari ka real face, main ab kisiko entertain nahi karti. Aao toh welcome, jao toh happy journey. Kehte hain life ka har ek pal ek chapter ki tarah hota hai jo step-wise sab sikhata hai. Thokar lagna bhi zaroori hai tabhi hum pehchan paate hain ki galti repeat nahi karni.
Aur phir aata hai zindagi ka sabse dukh-bhara mod jab ek billi ka ant aane wala hota hai. Woh sabse door chali jaati hai aur kisi andhere aur shaant kone mein chhup jaati hai. Woh nahi chahti ki uske pyaare log uski kamzori dekhein. Woh apna aakhiri pal akele hi guzarti hai aur sabse badi baat, woh kabhi roti nahi hai.
Science kehta hai ki ek cat kabhi ro nahi sakti, ye science ne proof kiya hai. Billi ke paas woh rasta ya mechanism nahi hota jisse woh dukh mein aansoo baha sake. Uske aansoo bas aankhein saaf karte hain. Hum insaan rokar apne bojh ko thoda halka kar lete hain par billi ko yeh aaram bhi nahi milta.
Main bhi uss billi jaisi hoon. Jab mera dil tuta hota hai toh main chup ho jaati hoon. Main chillati nahi, aansoo nahi bahaati, mera dard bas mere andar hi dab jata hai. Mujhe lagta hai ki hum dono ko yeh raaz pata hai ki kuch gehre zakhm aise hote hain jinhe aansoo ki nahi sirf khamoshi hi bardasht kar sakti hai.
Hum dono, billi aur main, apna dard chupchaap le kar is duniya se khamoshi mein alvida kahenge. Jinhone mujhe hamesha haste huye dekha hai, unke samne mujhe aisa chehra nahi dikhana jisse unhe takleef ho. Bas khudko dur kar lungi sabse. Maine life mein bahut ache log kamaye hain jo jaan se pyare hain, bas farak itna hai ki wo mujhse bohot dur hain. Main un logon ke samne kamjor nahi dikhna chahti jo mujhse inspire hain. Sorry un sabko jinse baatein chhupa rahi hu, bas samajh lo ki main khushi aur sportsman spirit ka pratik hoon, gham ka nahi. Jab mujhe yaad karoge toh aansoo mat bahana, bas un palon ko yaad karna jab hum saath the.
Imagine karne se hi khushi mil rahi hai na? Bas aise hi khush raho. Aur haan, kabhi life mein possible hua toh ek stray cat ko zaroor adopt karna. Toh yahi story hai ki mujhe dog se zyada cat kyun pasand hai. So story the end, tata bye bye.
Date: 03 Jun 2025