Date: 22 Sep 2019
Saturday)....
Shaniwar waise toh aata hai Sunday se pehle, isliye sabko accha lagta hai. Kyunki agle din wo Sunday lekar aata hai. Sunday matlab sukoon, masti, neend, travelling aur bahut kuch. Lekin mere liye Shaniwar ek surprise ki tarah hai. Kyunki Shaniwar ko ya toh kuch bahut accha hota hai ya phir bahut bura. Ye silsila bachpan se aaj tak chal raha hai.
Ek insaan ne bachpan mein bhavishyawani ki thi. Mujhe ye bhavishya, naseeb, ye sab par pehle vishwas nahi tha (par ab hai). Us insaan ne bola tha ki meri zindagi mein 5 log aayenge jo meri life mein aham role nibhayenge. Wo 5 log meri bahut help karenge. Unse kabhi kuch mat chhupana, unse jhagda mat karna, unko kuch bhala-bura mat bolna, agar aisa kiya toh iski bahut badi keemat chukani padegi. Un 5 logon mein tumhari taqdeer badalne ki taqat hai. Wo 5 log khud tumko milenge aur unka Shaniwar se connection hoga. Aur wo bhi pyar ke maamle mein unlucky honge, lekin unse mujhe pyar milega. Chahe main kitna bhi door jaun, wo apne aap meri zindagi mein aayenge.
Main in sab par trust nahi rakhta tha. Lekin jitni baar bhi maine is Shaniwar aur 5 number ko ignore kiya, utna hi wo meri taqdeer ki tarah hath dikha dete hain aur bolte hain ki teri taqdeer nahi badlegi chahe jo kar le. Aakhir mein mujhe ye maanna pada ki Shaniwar aur 5 ka connection meri zindagi se hai. Pehla insaan jo Saturday ko aaya meri zindagi mein...
1) Pritam
Pritam mujhe 12th mein mila, naya-naya college start hua tha aur uska admission late tha. Uska hath fracture tha, aaj bhi yaad hai mujhe. Wo form bharne aaya tha aur Shaniwar hone ke karan half-day tha. Isliye wo jaldi-jaldi kaam niptane mein laga tha. Tab usne pen maanga tha aur form bharne mein help maangi thi. Wo lefty tha aur fracture wala hath bhi left hi tha. Tab maine uski madad ki thi. Tab se lekar aaj tak wo mere saath hai.
Na jaane kitni baar usne accident ke baad, operation mein, aur personal problems mein madad ki hai. Aaj bhi yaad hai wo din jis din main ghar pe hi behosh tha, tab maine emergency services active kiya tha mobile mein. Jisme ek mobile number Pritam ka tha. Tab raat ke 3:30 ko wo ghar pe aaya tha, mujhe hospital admit karne se lekar cash payment tak usi ne sab kiya tha. Humari dosti bahut gehri hai. Humara milna kabhi normally hota hi nahi tha. Hum dono mein se ek ko problem ho tabhi dusra use suljhane aata tha. Hum dono ne bahut kuch aapas mein baanta hai. Uski behen ne mujhe rakhi bandhi thi. Hum dono ek-dusre ke parivaar ke bahut kareeb hain. Hum dono best friends hain, lekin ye baat hum dono ko jatana nahi aata. Humari ek bhi photo saath mein nahi hai, lekin dil se hum hamesha saath hain.
2) Mahi
Mahi meri junior hai lekin umar mein mujhse badi thi. College mein usse mulakat pehle college ke open canteen mein hui thi. Tab hum ek-dusre ko nahi jaante the. Unse dusri mulakat Shaniwar ko hi hui jab mere friend ka kuch jhagda hua tha aur Mahi un students ke saath aayi thi jo mere friend ko dhamkane aaye the. Tab Mahi kuch nahi boli thi, baaki ladke bol ke gaye the. Uske baad Mahi se milna hua Shaniwar ko hi online exam mein. Exam Shaniwar aur Sunday ko hi hote the college mein. Tab Shaniwar ko hi kitni baar unse mulakat hui. Tab se hum ek-dusre ko jaante hain aur tab se examination ka silsila chalu hua, aur har baar Shaniwar ko hi unse milna hota tha.
Mahi ke saath mera rishta bahut accha tha, wo apne bachpane se ab tak bahar nahi aayi thi. Wo kuch aisi baatein karti thi ki mujhe hasi bahut aati thi. Lekin serious baat aati hai toh usne mujhe khoob support kiya hai. Wo hamesha kehti thi ki bhoolna seekho aur aage badho, sabki life mein problem hai. Mahi ke apne family problems bhi bahut the lekin wo hamesha hasti rehti thi aur mujhe bhi hasati thi. Ek badi behen ki nazar se maine unhe hamesha dekha hai. Gunjan aur Mahi classmates thi aur internship mein bhi dono saath mein thi Pune mein. Tab dono mein se ek se bhi baat karu toh dono ko pata chal jata tha. Ye dono bahut kareeb hain mere liye. Wo kabhi kisi ke mann ko baat lage aisi baat nahi bolti, bhale samne wala galat kyun na ho. Humara jab jhagda hota tha WhatsApp chat pe toh bahut der tak chalta tha. Hum ek-dusre ki beizzati karte the funny stickers ke saath. Unka care karna, chidhana aur "tote ki naak wala" bulana mujhe hamesha hasata tha.
3) Gunjan
Gunjan bhi Mahi ki classmate thi. Online exam mein mulakat hui thi Shaniwar ko hi. Baaki sab friends se zyada Gunjan mere mann ke bahut kareeb thi. Uska nature thoda gusse wala hai. Wo sabko aisa dikhati hai ki wo bahut matlabi hai, lekin sachai isse alag thi. Uska ek rule hai—na kisi se mann lagao aur na hi khud ko takleef do. Wo dil ki bahut soft hai aur pyar ke baare mein mujhse zyada jaanti thi. Mere mushkil waqt mein usne bahut saath diya hai—study, bimari aur operation ke baad support dena. Gussa dikhakar pyar jatana use bahut acchi tarah se aata tha. Aaj se pehle zindagi mein koi nahi aaya jiska main itna sab kuch maan lu.
Agar kabhi uske ehsaan chukane ki baari aayi toh har wo cheez karunga jo possible hai. Last time jhagda hua tha aur baat band ho gayi thi. Mera operation tha, last moment par usse call par baat hui tab jaake mental condition stable hui aur operation successful raha. Dusri zindagi usi ne di hai mujhe. Mujhe usse sirf behen ka pyar chahiye. Please kabhi chhodna mat mera hath, zaroorat hai tumhari mujhe. Jo behen ka pyar tumse mila wo aur koi nahi de sakta. Zindagi ki aakhri saas bhi chal rahi hogi na, tab bhi tumhein nahi bhoolunga. Wada hai khud se mera.
4) Scar-L (Sakshi)
Sakshi meri junior thi aur usse mulakat bhi online examination mein Shaniwar ko hi hui thi. Sakshi ek hansmukh ladki thi, hamesha mujhe hasana aur "bhaiya bhaiya" keh ke pareshan karna uska kaam tha. Wo apne andar kitne dard chhupati hai par dikhti aisi hai ki sab thik hai. Uski awaaz bahut pyaari hai aur main use apni chhoti behen maanta hu. Wo har chhoti-badi baat mein khushiyan dhundti hai. Usne apni saari baatein mujhse share ki hain.
Uska kehna hai ki aaj tak usse koi nahi mila jo uske mann ki baat padh sake, aur main wo insaan tha jo uski saari mann ki baat padh sakta tha. Use jhooth bolna nahi aata tha. Usne ek baar meri jaan bachayi thi jab maine duniya chhodne ka faisla kiya tha, tab wo zid par ad gayi thi ki agar maine kuch kiya toh wo bhi khud ke saath kuch kar legi. Tab jaake maine apna faisla badla. Main kismat wala hu jo mujhe itna pyar karne wali behen mili jo mere liye jaan dene ko taiyaar rehti hai.
5) Shruti
Shruti se mulakat ek exam mein hui thi Shaniwar ko hi. Baat-cheet badhti gayi tab usne mujhe propose kiya tha. Shruti ek chulbuli ladki thi. Usne ek line boli thi—"Tum baaki ladko se alag ho." Baad mein pata chala use thalasemia tha, jisme body khud khoon taiyaar nahi kar sakti. Use lagta tha ki wo mera zindagi bhar saath nahi de payegi, isliye wo door ho gayi. Wo Mahi ke contact mein thi aur usne wada kiya tha ki mujhse contact nahi karegi, lekin wo Gmail se contact karti thi. Kuch misunderstanding ki wajah se meri aur Mahi ki baat-cheet band ho gayi, mujhe nahi pata wo Shruti ki wajah se hua ya kisi aur baat se.
Overall, maine Gunjan aur Mahi ka dil dukhaya tha, shayad isliye aaj wo contact mein nahi hain. Kismat dekho, aaj main treatment ke liye Tamil Nadu ja raha hu toh raste mein unke sheharo se guzar raha hu lekin mil nahi pa raha. Treatment successful hone ke chance bahut kam hain, jaisa naseeb mein likha tha waisa hi ho raha hai. Bas jaate-jaate sabse baat karni thi par shayad nahi ho payegi. Ab koi marne ka darr nahi hai, jitne sapne dekhe the sab poore kar chuka hu. Bas Gunjan aur Mahi se ek baar baat karni hai. Agar treatment fail hua aur main mar gaya, toh wada hai khud se—marne ke baad bhi pehle Scar-L, Gunjan aur Mahi se milke jaunga. Jab tak unki maafi nahi milti, meri aatma bhi is duniya se nahi jayegi. Wade ka pakka hu main, dekh lena...
Taqdeer..... ππ