Homepage Dream Team

Ye safar bahot hi yadgaar rahega. Is safar me dukh, khushi, apno ki narajagi sab bhare hue thi. Ek taraf mera operation tha dusri taraf meri dost jisko anjane me maine galat baat bol di thi. Shuruwat se shuru karta hu. Mera first time tha out of state jane ka. Muje jana tha Chennai jise ham Madras bhi kahte hai. Ek India ka bada traditional, cultural city. Barish ke mousam me Chennai me najara dekhane vala hota hai. Mera safar shuru hua raat ko train se. Karib 11:15 PM ki train thi aur hame karib 17 ghante lagne vale the Chennai pahonchne ke liye. Meri job aisi hai ki muje job se traveling karni padti thi.

Lekin is baar Chennai jana koi job ka hissa nahi tha. Vajah tha mera operation. Gale ke paas ke naso me blockage ho gaye the jisse blood circulation thik se nahi ho pa raha tha brain ko. Is vajah se chakkar aana, sir dard karna ye sab hone laga tha. Is operation ka khracha meri company karne vali thi, jo 1 lakh tak hospital bill bharne me madat karti thi apne employee ke liye. Operation ke kharache ka 10% employee ko bharna padta tha. Company ne Chennai me hospital me admit ka decision liya tha. Date fix ho gaye thi. Wo din bhi aa gaya tha. Ye baat pata thi sirf mai aur mere dost Aashish (name changed) ko.

Aur bhi friend thi jo friend se jyada sister zone thi. Unse ye baat chupani padi. Gunjan (name changed) thi apne job ko leker tension me aur Mahi thi apne personal problem me. Toh unko mere pareshani bata kar aur pareshan karna thik nahi samjha. Unhe bina bataye jana pada. 4 din tak muje contact karti rahi lekin mera mobile mere paas nahi tha. Unko contact karna mushkil sa ho gaya tha.

Office ke jo Health Department officer the unke paas mera mobile rakha gaya tha. Mere call aur msg ko vahi respond kiya karte the. Unko khas bata diya ki Gunjan aur Mahi ke kisi bhi message ko reply bina puche na kare. Checkup se leker operation tak mobile unke paas hi tha. Isliye unse ye jhuth bolna pada ki office ke work ke liye muje Chennai jana pad raha hai. Vapas aane par bhi yahi jhuth bolana pada. Pata nahi ye jhuth aage jakar mujhe kitna mahanga padega, kyunki itni badi baat maine chupaye thi unse. Mai din bhar ki har naye purani bate unse share karta tha lekin itni badi baat chupani padi.

Aur hua bhi vahi, checkup ke baad unhone operation ke liye aage ki date de di. Saath hi operation se related information di thi ki operation successful hone ke chance kya hai, us hisab se 70% chances failure ke the. Iska matlab tha ki bahot kam chances hai possible hone ke. Vapas apne shahar aane par bahot sari bate dimag me thi jo kabhi expect nahi kiya tha wo ho raha tha. Maine bhi vahi kiya jo har koi karta hai apne last time me. Dusron ki khushi ke bare me sochna, dusron ko khushi dena, galtiya sudharna etc.

Pahle jab maine Mahi se milne ki baat ki thi tab galti se bol diya tha ki mujhe baad me milna hoga nahi hoga is liye mujhe aap dono se milna hai. Tab wo bahot ghabra gaye thi aur unko bhi andaja ho raha tha ki me kahi aisi jagah jane ki baat kar raha hu jaha se aana possible nahi hai. Tab maine jhuth bol diya ki contract hai 6 month ka is liye waise bola tha aur kuch darne ki baat nahi hai. Jaise taise jhuth bol diya unse aur checkup ke liye chala gaya tha. Laga tha checkup me kuch darne vali baat hogi hi nahi, toh bata kar tension kyu dena. Lekin kismat ko kuch aur hi manjur tha.

Ab jab operation ke liye jana tha kuch dino baad tab mai jyada se jyada time spend karne laga chatting pe Gunjan aur Mahi ke saath. Mahi jo married thi aur ek maa bhi thi. Gunjan meri junior thi same college me. Mahi aur Gunjan classmate thi. In dono se meri mulakat hue thi exam section me. Me online exam leta tha government ki toh hame college ke liye supervisors lagte the. Toh ye dono hamare junior thi toh unhe ham bulate the. Aise hi hamari mulakat hue thi aur mulakat bahot aage jakar bestfriend me badal gayi.

Exam ke day ko full masti hoti thi. Toh aise hi dono best friends ban gaye thi. Dono me Gunjan se jyada mai freely bate karta tha. Gunjan already pyar ke mamle me bahot bar unlucky rahi thi, jisse bhi wo pyar karti wo usse dur ho jata tha. Usne mujhe apne bahot sare past incidents share kiye the aur maine bhi. Toh Gunjan se bate jyada hoti thi raat bhar tak. Gunjan ek free minded aur chulbuli ladki thi. Uska bolne ka andaj aur behavior alag tha jo sabko apni taraf attract karta tha, jisme mai bhi tha.

Lekin mai inme padne vala nahi tha. Isliye man me galat bate na aaye, maine sidha use bahen hi man liya. Jab operation ke liye jane me 4-5 din bache the, tab ek raat bate karte waqt kuch aisa topic nikal aaya ki Gunjan galat decision le rahi thi. Mujhe use rokna pada lekin wo manne ko tayyar hi nahi thi. Tab mujhse kuch aisi baat nikal gayi jo mujhe nahi bolna tha. Wo baat sunkar wo naraj ho gayi aur baat karna bhi chhod diya.

Maine jo bola isliye bola tha ki me kitne din hu mujhe nahi pata tha, aur iske baad baat hogi ya nahi ye bhi pata nahi tha. Isliye jaldi me mujhse galat baat nikal gayi. Anjane me hi maine use dukh pahonchaya. Operation ke din tak bahot sari bate karni thi lekin wo baat hi nahi kar rahi thi. Msg ka reply nahi aur WhatsApp pe block kar diya. Bahot jiddi hai wo. Operation ka din karib aa raha tha aur mujhe usse aakhri baar baat karni thi, mafi mangni thi, jo jane tak possible nahi hue.

Toh maine Mahi ko bataya ki Chennai jana hai operation ke liye. Maine jane se pahle Shruti se milne ki soch li. Shruti wo ladki hai jo meri kismat me girlfriend ban ke aayi thi lekin kismat me uska milna nahi likha tha. Usse milne me uske college gaya tha. Usse ye vada kiya tha ki me ab relationship ke bare me koi baat nahi karunga, tab jake usne milne ko haa kaha. Ham sirf hafte me ek baar baat karte the. Last time jab baat hui tabhi maine milne ka pucha tha. Perso usse mil kar aaya hu. Milne gaya tha tab bahot kuch bolna tha lekin himmat nahi thi.

Ab jab mere operation ki baat thi tab usse milna tha mujhe aakhri baar. Man me bahot sari bate thi lekin bol nahi paya. Bas yaha vaha ki bate ki aur jate waqt maine sidha Shruti ko gale se laga liya. Kuch bhi nahi socha maine ye karte waqt. Baad me realize hua ki maine shayad galat kiya hai, lekin hairani ki baat ye thi ki usne kuch bhi nahi bola. Shayad usse meri baaton se kuch alag laga hoga. Maine sorry bolkar vaha se jane ka soch liya. Maine usse mail ID mangi aur usne bina sawal kiye de di. Vaha se nikalne par maine Shruti ko apne sare social media ke username aur password de diye aur bola ki 6 din baad inhe delete kar dena.

Mera YouTube, blog, Facebook aur WhatsApp pe bahot logon se batchit hoti thi toh unko pending par rakhne se accha account delete karna laga. Aur mujhe Shruti se accha aur koi nahi laga ye kaam dene ke liye. Mai Mahi ko bhi bol sakta tha lekin unko apni condition ke bare me pata nahi chalne dena chahta tha. Bas ab Chennai ka safar chalu hua hai. Ab 2-3 din me operation hone wala hai. Bas ek baar Gunjan se sorry bolna tha. Dekhte hai ab vapas jana kismat me hai bhi ya nahi. Yahi hai aakhri safar.

Main 70% failure me hu ya 30% success me, pata nahi. Sab kismat par chhod diya maine. Agar vapas aana hota hai toh 3 chije karni hai: ek, sabse pahle mujhe apni bhanji ko hath me lena hai jo 3-4 din pahle paida hue hai. Dusri, Gunjan se mafi mangni hai. Aur third, Mahi aur Gunjan se milna hai aur unko ghar bulana hai.

Man me toh bahot kuch hai lekin itni chije toh karni hi hain. Dekhte hain aage kya hota hai...